Nice to Meat You

Oumabrood – gerooster en opgedien met romerige hoenderlewertjies

Bestanddele

500 g koekmeel

15 ml bruin suiker

10 ml sout

7,5 ml korrelgis

30 ml sonneblomolie

12,5 ml wit asyn

400 ml warm water

Metode

  1. Meng al die droë bestanddele in ’n groot mengbak.
  2. Meng al die nat bestanddele.
  3. Voeg die nat bestanddele by die droë bestanddele en meng goed, maar nie te veel nie.
  4. Skep deegmengsel in ’n gesmeerde mediumgroot broodpan, bedek met ’n vadoek of kleefplastiek en laat vir 30 minute tot 1 uur in die oond rys by 40 °C.
  5. Bak vir 45 minute tot 1 uur by 180 °C.
  6. Haal uit die oond en keer die brood uit om af te koel voor dit gesny word.

Hoenderlewertjies met brandrissie

Bestanddele

Botter

Olie

Bruin uie, gekap

Knoffel, fyngekap

Brandrissie, fyngekap

Hoenderlewertjies

Sout en peper

Room

Worcestershiresous

Bruin uiesoppoeier

Metode

  1. Week lewertjies in melk vir ten minste een uur voor jy begin kook.
  2. Sit olie en ’n bietjie botter in ’n braaipan. Voeg uie, knoffel en brandrissie by. Verbruin vir ’n paar minute maar maak seker dat die knoffel nie aanbrand nie.
  3. Voeg die hoenderlewertjies na ’n paar minute by die uie-knoffel-en-brandrissiemengsel. Maak seker dat jy nie die lewertjies oorgaar maak nie; dit moet nog effens pienk wees in die middel.
  4. Geur met sout en peper na smaak.
  5. Voeg die room by. Sodra dit begin borrel, draai die hitte af en laat dit vir ’n paar minute prut.
  6. Geur met Worcestershiresous na smaak en skep op geroosterde Oumabrood met vars kruie van jou keuse. Jy kan ook ’n bietjie suurlemoensap oorsprinkel as jy dit ’n bietjie ligter wil maak.

Eiers Benedict

Bestanddele (twee porsies)

1 of 2 snye Oumabrood/brood van jou eie keuse (of Engelse muffins)

4 eiers

6−8 strokies streepspek

Vars roketblare

Hollandaisesous – genoeg vir 2 porsies, gemaak met:

2 eiergele

5 ml suurlemoensap

+/- 100 g gesmelte botter

Sout

Swart peper

Rooi peper

Metode

Hollandaisesous

  1. Skei 2 eiers en plaas die eiergele in die bak waarin jy die hollandaisesous gaan maak.
  2. Drup die suurlemoensap by die eiergele en meng goed met ’n draadklitser.
  3. Smelt die botter in ’n potjie op ’n stoofplaat of in die mikrogolf.
  4. Voeg die warm gesmelte botter stadig by die eiergele en klop heeltyd met die draadklitser. Hou aan om gesmelte botter by te voeg totdat die mengsel die dikte bereik het wat jy verkies.
  5. Geur met sout, swart peper en rooi peper. As die mengsel te dik geraak het, verdun dit met ’n klein bietjie melk.
  6. Giet die hollandaisesous in ’n fles en hou warm tot jy wil opdien.

Geposjeerde eiers

  1. Gebruik ’n posjeerpan en olie die pan of spuit met Spray & Cook.
  2. Wag tot die water kook en voeg dan die eiers in die posjeerhouertjies.
  3. Wanneer die eiers gaar is, haal uit en plaas bo-op of langs die spek wat bo-op die roosterbrood geplaas is.
  4. Giet hollandaisesous oor eiers en dien dadelik op met vars roketblare as garnering.

Ontbytpannekoek

Bestanddele (10 pannekoeke)

3 eiers

500 ml yswater

7,5 ml bakpoeier

2,5 ml sout

500 ml koekmeel

125 ml olie

12,5 ml asyn

Metode

  1. Meng die eiers en yswater goed.
  2. Sif die droë bestanddele en voeg stadig by die nat mengsel.
  3. Voeg nou die olie en asyn by en meng goed, maar nie te veel nie.
  4. Die mengsel moenie te dik wees nie. Indien dit te styf is, voeg ’n bietjie melk of room by. Laat staan in die yskas totdat jy reg is om die pannekoek te bak.

Witsous

Bestanddele (vir 2 koppies)

25−37,5 ml botter

25−37,5 ml koekmeel

250 ml melk

250 ml room

Sout en peper

Metode

  1. Smelt die botter in ’n klein kastrolletjie.
  2. Laat die botter bietjie bruin word en voeg dan die meel by. Gebruik ‘n draadklitser om seker te maak daar is nie klonte nie.
  3. Voeg die room en melk stadig by en maak seker dat jy steeds goed meng om klonte te voorkom.
  4. Geur met sout en peper.

Vulsel

250 ml gerasperde geel kaas

250 ml ham van goeie gehalte, in blokkies gesny

3 sprietuie (hou die groen puntjies eenkant vir garnering)

10 ml paprika

Metode

  1. Meng die gerasperde kaas en ham met die sprietuie en geur met paprika.
  2. Vul die pannekoeke met hierdie vulsel en pak langs mekaar in ’n oondbak in ‘n louwarm oond by Bedek met ’n deksel om te verhoed dat die pannekoek uitdroog. (‘n Mens kan ook die bak met pannekoeke binne ’n groter oondbak plaas wat met water gevul is.)
  3. Wanneer jy gereed is om op te dien, bedek die pannekoeke met die witsous. Strooi nog ’n bietjie paprika en die groen puntjies van die sprietuie daaroor en bedien dadelik. Kan ook met ’n skyfie suurlemoen voorgesit word.

Romerige roereiers

Bestanddele (twee porsies)

4 tot 6 eiers

12,5−25 ml roomkaas

Sout en peper

Aromat

12,5 ml botter

Metode

  1. Breek die eiers in ’n mengbak en skep ’n paar lepels roomkaas om met die eiers te meng.
  2. Meng met ’n draadklitser om seker te maak jy breek die roomkaas op in kleiner stukkies. As jou roomkaas te hard is, plaas dit vir ’n paar sekondes in die mikrogolf.
  3. Geur met sout, peper en ’n bietjie Aromat na smaak.
  4. Smelt die botter in ’n pan. Laat die botter effens bruin word, maar maak seker dat dit nie aanbrand nie.
  5. Sodra die botter lekker neuterig ruik, giet die eiermengsel in die pan. Moenie te veel in die rondte meng nie, gebruik meer ’n vou-aksie.
  6. Kook tot dit so gaar is as wat jy verkies en skep op roosterbrood of varsgebakte brood om op te dien.

Kruieslaaisous

Bestanddele

750 ml kanola-olie

5 eiers

4 sprietuie

125 ml wit asyn

125 ml strooisuiker

20 ml gemengde droë kruie (groen kruie soos tiemie, roosmaryn, oreganum)

125 ml vars pietersielie

2,5 ml sout

3 knoffelhuisies

Metode

  1. Plaas al die bestanddele saam in ’n versapper en meng goed tot die slaaisous lekker romerig is.
  2. Proe en pas die soutinhoud na smaak aan.
  3. Kan tot 2 maande in die yskas gehou word.

Hoenderpastei

Bestanddele (12 klein/individuele pasteie)

Deeg

500 ml koekmeel

200 g botter (sny in blokkies en hou in die yskas tot jy dit gebruik)

1 eier

1,25 ml sout

10 ml asyn

30 ml yswater

Metode

  1. Meng die meel en koue botter in ’n Kenwoodmengbak met die K-klopper en maak seker die botter is goed deurgemeng, maar nie fyn nie; jy moet nog stukkies botter kan sien.
  2. Meng die yswater, asyn, eier en sout saam en voeg stadig by die meel-en-bottermengsel tot dit net gemeng is en ’n growwe deegbal vorm.
  3. Haal uit die mengbak en vou so twee keer.
  4. Bedek met kleefplastiek en hou in die yskas tot jy reg is met die hoendervulsel.

Hoendervulsel

Bestanddele

1 heel hoender, ongeveer 1,3–1,4 kg

1 bruin ui

1 hele bol knoffel

250 ml wit wyn

12,5 ml heel swartpeperkorrels

2 lourierblare

6 takkies vars tiemie

250 g streepspek

1 klein/’n halwe groot bruin ui

3 knoffelhuisies

250 g sampioene

Witsous (vir 2 koppies)

25–37,5 ml botter

25–37,5 ml koekmeel

250–500 ml hoenderaftreksel

125 ml melk/room

Sout en peper

Dijonmosterd

1 eier

30 ml water/melk

Metode

  1. Plaas die hoender in ’n groot genoeg kastrol en bedek die hele hoender met water.
  2. Voeg al die bestanddele by en laat die hoender kook tot dit sag is en die vleis van die been afval.
  3. Haal die hoender uit die kastrol en laat afkoel. Laat die water-, wyn- en kruiemengsel aanhou kook tot jy die helfte van die inhoud oor het; dis lekker tuisgemaakte hoenderaftreksel.
  4. Verwyder al die vleis van die bene en kap in fyn stukkies.
  5. Braai die spek in ’n pan en kap dan in kleiner stukkies. Hou eenkant.
  6. Verbruin die uie, knoffel en sampioene in dieselfde braaipan waarin die spek gaar gemaak is.
  7. Meng die spek met die sampioenmengsel en die fyngekapte hoender.
  8. Maak ’n sous met die hoenderaftreksel deur die botter en meel in ’n kastrol te meng en dan die hoenderaftreksel by te voeg tot jy ’n dikkerige hoendersous het. Voeg ekstra room of melk by indien nodig.
  9. Geur met mosterd, sout, swart peper en ’n bietjie suurlemoensap.
  10. Meng die sous met die hoendermengsel.
  11. Rol die deeg uit tot die verlangde dikte. Sny in groot sirkels of voer die holtes van ’n muffinpan daarmee uit.
  12. Vul die deeg met die hoendervulsel en bedek met nog ’n stukkie deeg.
  13. Meng die eier en melk/water en verf met ’n kwassie oor die pasteie voor jy dit bak.
  14. Bak 30–45 minute by 180 °C totdat die deeg opgepof het en mooi bruin is.

Soutkaaskoek met ‘eksotiese’ tamaties (met erkenning aan die Food and Home-tydskrif)

Bestanddele

60−70 g kraakbeskuitjies

40–50 g botter

250 g roomkaas

75 g fyn parmesaankaas

200 g ricottakaas

2 eiers

7 ml koekmeel

Sout en peper

Aromat

Mosterdpoeier

Wit uiesoppoeier

350 g ‘eksotiese’ tamaties

Vars basiliekruidblare

Olyfolie

Balsamiese asyn

Metode

  1. Plaas kraakbeskuitjies en gesmelte botter in ’n voedselverwerker en maak die kaaskoek se kors. Druk die kors vas in ’n losboomveerpan wat met botter gesmeer is. Plaas in yskas om styf te word.
  2. Voorverhit die oond tot by 200 grade °C .
  3. Meng die res van die bestanddele (behalwe die tamaties, basiliekruidblare, olyfolie en balsamiese asyn) en geur met sout, peper, Aromat, wit uiesoppoeier en paprika na smaak.
  4. Bak die kaaskoek vir 10 minute teen 200 °C en verlaag dan die temperatuur tot 100−120 °C vir 1,5 tot 2 uur. Maak seker die kaaskoek is styf en deurgebak. Los vir 1 uur in die oond om af te koel.
  5. Bedek met die tamaties en vars basiliekruidblare en giet olyfolie en balsamiese asyn oor net voor jy dit opdien.

Skelvisrollade met kapokaartappels

Bestanddele

Vulsel

37,5 ml botter

50 ml koekmeel

375 ml melk

3 eiers, gekook en fyngekap

15 ml aangemaakte mosterd

5 ml vars gekapte pietersielie

Sout en peper

50 g gerasperde geel kaas

7,5 ml Aromat

Sap van ’n halwe suurlemoen

Gebakte rollade

250 g gerookte skelvis, gaargemaak

4 eiers, geskei

75 ml room

50 ml fyn parmesaankaas

Sout en peper

Metode

  1. Maak ’n witsous met die botter, meel en melk.
  2. Meng die gekapte eiers, mosterd, pietersielie, sout, peper en gerasperde kaas met die witsous.
  3. Geur na smaak met nog sout of peper en suurlemoensap.
  4. Plaas die gaar skelvis in ’n voedselverwerker en blits vinnig tot fyn.
  5. Voeg die 4 eiergele, room en parmesaankaas by.
  6. Klits die eierwitte tot dit punte vorm en vou in die skelvismengsel in.
  7. Plaas in ’n vlak oondpan wat met bakpapier uitgevoer is.
  8. Bak in oond by 200 °C vir sowat 15 tot 20 minute. Laat afkoel en keer op ’n houtbord uit.
  9. Smeer die vulsel bo-oor die gebak. Rol op en sny in snye van om en by 2,5 cm. Dien op met kapokaartappels.

Geroosterde hoender met gebraaide boereaartappels

Bestanddele

1 heel hoender

100 g botter, sag gemaak maar nie gesmelt nie

3 knoffelhuisies, fyngekap

Sout en peper

Sap van 1 suurlemoen

Baksakkie

Wit uiesoppoeier

1 rooi ui, in kwarte gesny

Metode

Geroosterde hoender

  1. Meng sagte botter met die knoffel, sout en peper. Druk die bottermengsel onder die vel van die hoenderbors. Smeer die res van die bottermengsel oor die hoender.
  2. Plaas die hoender en die rooi ui in die baksakkie en strooi die wit uiesoppoeier daarin.
  3. Bak vir om en by 1 tot 1½ uur, afhangende van hoe groot die hoender is.
  4. Haal die hoender uit en laat rus voor dit in stukkies gesny word.
  5. Giet die sous van die baksakkie oor in ’n klein kastrol saam met die saggekookte rooi ui. Bring tot kookpunt en voeg room by, of nog wit uiesoppoeier indien dit nie dik genoeg raak nie.
  6. Bedien saam met gebraaide boereaartappels.

Gebraaide boereaartappels

  1. Kook heel aartappels tot sag.
  2. Breek die aartappels oop.
  3. Braai in olie vir ’n paar minute. Haal uit en laat rus.
  4. Braai vir ’n tweede keer tot goudbruin. Geur met sout en Aromat. Dien dadelik op.

Stadig-geroosterde lam

Bestanddele (8 tot 10 mense)

Lamsblad met bladbeen en skenkelbeen

375 ml olyfolie

125 ml worcestersous

Sout en peper

Sap van 2 suurlemoene

2 knoffelbolle

1 pakkie vars roosmaryn

Metode

  1. Druk suurlemoensap oor lamsvleis uit.
  2. Vryf vleis in met olie en Worcestershiresous.
  3. Geur met sout en peper.
  4. Plaas die knoffelbolle en roosmaryn om en onder die lamsvleis.
  5. Bedek met foelie en bak vir 45 minute by 230 °C. Verlaag daarna die hitte en bak nog 2,5 tot 3 uur by 170 °
  6. Sny in stukke en bedien met vleisaftreksel.

Pampoenpoffertjies

Bestanddele (12 tot 15 poffertjies)

300 g pampoen, in blokkies gesny

10 ml olie

15 ml gouestroop

1,25 ml fyn kaneel

1,25 ml fyn gemmer

Olie vir diepbraai

30 g gesmelte botter

125 ml suiker

1 eier

Gerasperde geel skil van 1 lemoen

125 ml karringmelk

140 g bruismeel

1,25 ml sout

5 ml fyn kaneel

2,5 ml gemengde speserye

100 g suiker

10 ml fyn kaneel

Karamelsous

60 ml botter

250 ml suiker

250 ml room

5 ml vanieljegeursel

Knypie sout

Metode

  1. Rooster die pampoen met die kaneel en gemmer in ’n oond by 180 °C tot deurgaar.
  2. Meng die gesmelte botter met die suiker, eier, lemoenskil en karringmelk.
  3. Sif die meel, sout, kaneel en speserye in ’n aparte bak saam.
  4. Meng die nat met die droë bestanddele en maak seker daar is nie klonte nie.
  5. Meng die suiker en kaneel saam om kaneelsuiker te maak.
  6. Skep eetlepelsvol van die pampoenmengsel in warm olie.
  7. Braai tot goudbruin en deurgaar. Plaas op papierhanddoek om oortollige olie te absorbeer.
  8. Maak die karamelsous deur al die bestanddele saam in ’n potjie te sit. Bring tot kookpunt en skakel dan die plaat af.
  9. Strooi kaneelsuiker oor die gebraaide pampoenpoffertjies en giet die karamelsous bo-oor.

“Southern Fried Chicken” (Bertus Basson se resep)

Bestanddele

8 hoenderstukkies

500 ml karringmelk

Sout en peper

Paprika

750 ml koekmeel

Sout en peper

Aromat

Paprika

2 l braai-olie

Metode

  1. Laat lê die hoenderstukkies vir ’n paar uur in die gegeurde karringmelk, verkieslik oornag.
  2. Haal die hoenderstukkies uit die karringmelk en dompel in die meelmengsel. Skud oortollige meel af en braai in warm olie tot deurgaar en goudbruin.

Koolslaai

Bestanddele

¼ kop wit kool, fyn gesny

1 klein kop rooi kool

4 wortels, geskraap en gerasper

250 ml mayonnaise

125 ml ongegeurde jogurt

50 ml aangemaakte mosterd

Sout en peper

Paprika

Aromat

Sesamsaad

Metode

  1. Meng die kool en wortels.
  2. Meng die mayonnaise en jogurt en geur met die geurmiddels na smaak.
  3. Meng die mayonnaisemengsel met die kool en wortels en plaas in die yskas vir ’n paar uur voor jy dit bedien.
  4. Braai die sesamsaadjies totdat dit ligbruin is en laat afkoel voor jy dit oor die koolslaai strooi.

Spaghetti Bolognese

Bestanddele

2 rooi of bruin uie

4–6 knoffelhuisies

50 ml gedroogde oreganum of Italiaanse kruie

Olie (olyf- /sonneblom- /kanola-)

1 kg gemaalde beesvleis

2 blikkies tamatiepasta

2 blikkies heel pruimtamaties, blits in voedselverwerker

Tamatiesous

Sout en wit peper

Bruin suiker

Room

Metode

  1. Braai die uie en knoffel in olie saam met die gedroogde kruie totdat die uie begin sag raak.
  2. Voeg die maalvleis by en verbruin.
  3. Voeg die tamatiepasta by en roer deur.
  4. Na die heel pruimtamaties geblits is, moet dit saam met 2 blikkies water by die vleismengsel gevoeg word.
  5. Geur met sout, peper en suiker en nog kruie na smaak.
  6. Laat prut vir 2 tot 3 uur.
  7. Voeg room by net voor jy opdien.
  8. Strooi parmesaankaas bo-oor.
Notice: Trying to access array offset on value of type bool in /usr/www/users/weddiny/wp-content/plugins/ds-suit/includes/modules/MasonryGallery/MasonryGallery.php on line 447