The Ground Resepte

FYNGEMAAKTE AVOKADO OP ROOSTERBROOD

Bestanddele

1 ryp avokado, geskil en ontpit

1 knippie gedroogde brandrissievlokkies

½ lemmetjie of suurlemoen se sap

Sout en peper na smaak

Ekstra-suiwer olyfolie

Metode

  • Plaas avokado in ’n bak en voeg rissievlokkies, lemmetjiesap, sout en ’n skeutjie olyfolie by.
  • Maak met ’n vurk fyn totdat die tekstuur so glad of so grof is as wat jy verkies.
  • Smeer op roosterbrood en garneer met geroosterde tamaties en ’n geposjeerde eier.

 

SAMPIOENSOUS

Bestanddele

15 ml gesoute botter

30 g meel

15 ml olyfolie

½ geel ui

5 g gedroogde tiemie

10 ml sojasous

100 ml rooiwyn

250 ml (250 g) sampioene, gekap

150 ml vars room

Sout en peper na smaak

Metode

  • Braai fyngekapte uie en tiemie in olyfolie, voeg botter by en laat dit smelt.
  • Wanneer dit gesmelt is, voeg meel by en klits oor lae hitte totdat die mengsel glad is.
  • Voeg sojasous en rooiwyn by, gevolg deur gekapte sampioene. Klits gedurig om te keer dat die sous klonte maak.
  • Prut totdat sous dik word, voeg room by en geur met sout en peper.

 

MACARONI EN KAAS

Bestanddele

Witsous

30 ml botter

30 g meel

250 ml volroommelk

125 g cheddarkaas

50 g mozzarellakaas

50 g parmesaankaas

 

Ander bestanddele

1 pakkie macaroni of fusillipasta

90 ml botter, in blokkies gesny

125 ml meel

1 l 2%-melk, verwarm

1 l gerasperde mozzarella

500 ml gerasperde extra-skerp cheddarkaas

10 ml sout

3,75 ml varsgemaalde peper

1,25 ml varsgemaalde neutmuskaat

125 ml gerasperde parmesaankaas

30 ml botter, gesmelt

Metode

  • Voorverhit oond tot by 180 °C.
  • Kook macaroni tot al dente. Dreineer; sit terug in die pot.
  • Smelt botter in ’n groot pan oor matige hitte.
  • Roer meel by tot die mengsel glad is; klits warm melk by.
  • Bring tot by kookpunt en roer gedurig; laat 2-3 minute kook en roer totdat die sous verdik.
  • Haal van hitte af; voeg mozzarella en cheddar, sout, peper en neutmuskaat by.
  • Voeg by macaroni, meng liggies en plaas in ’n gesmeerde oondskottel.
  • Meng parmesaankaas en gesmelte botter liggies; sprinkel oor die gereg.
  • Bak sonder deksel vir 30-40 minute of totdat dit borrel en die bokant goudbruin gebak het.

 

MELANZANE

Bestanddele

2 klein eiervrugte

1 bossie vars basiliekruid (15 g)

1 knoffelhuisie

Olyfolie

1 x 400 g blikkie tamaties

75 g mozzarellakaas

50 g droë broodkrummels

10 g parmesaankaas

1 suurlemoen

Ekstra-suiwer olyfolie

50 g roket

Metode

  • Voorverhit die oondrooster en plaas ’n groot bakplaat op ’n rak na aan die rooster.
  • Sny eiervrug in die lengte in ½ cm-skywe en plaas in ’n bak. Besprinkel goed met seesout en meng liggies, hou dan eenkant.
  • Pluk basiliekruidblare, hou eenkant en kap die stingels fyn.
  • Skil knoffel en kap dit fyn.
  • Verhit 7,5 ml olyfolie in ’n mediumgroot pan oor matige hitte, voeg knoffel en basiliekruidstingels by, braai dan liggies vir 2 minute.
  • Voeg helfte van die tamaties by (bêre die res vir ’n ander dag) saam met ewe veel water.
  • Kook vir 10 minute, of totdat dit verdik.
  • Spoel intussen die eiervrug af en druk droog met papierhanddoek.
  • Plaas in ’n bak en meng liggies met 22,5 ml olyfolie en genoeg sout en peper.
  • Sprei eiervrug uit oor die warm bakplaat en plaas onder die rooster (jy sal dit dalk meer as een keer moet doen want daar moet slegs een laag op ’n slag wees).
  • Rooster vir 5 minute, of totdat die skywe bruin is, draai dan om en rooster vir nog 5 minute. Hou dit dop terwyl dit rooster en plaas dan in ’n bak.
  • Proe die sous en geur, giet dan oor die eiervrug.
  • Voeg geskeurde basiliekruidblare by en meng.
  • Versprei egalig oor die bakplaat en voeg mozzarellaskaafsels by.
  • Besprinkel met broodkrummels en rasper parmesaan bo-oor; plaas terug onder die rooster.
  • Rooster totdat die kaas gesmelt is.
  • Druk intussen die helfte van die suurlemoen se sap in ’n bak uit, voeg 15 ml ekstra-suiwer olyfolie, sout en peper by. Meng goed en meng dan liggies met die roket.
  • Wanneer die parmigiana heerlik borrel, verdeel dit tussen borde en dien op met roket.

 

GARNAAL- OF HOENDERLINGUINE

Bestanddele

15 ml olyfolie

4 grasuie, gesny

1 rooi brandrissie, gesny

2 knoffelhuisies, fyngekap

400 g uitgedopte garnale (kan met 4 hoenderborsies vervang word)

250 ml vars room

250 ml vars of bevrore ertjies

300 g linguinepasta, gekook tot al dente

1 suurlemoen se sap en skil

60 ml pietersielie, gekap

Sout en peper

Metode

  • Verhit olie in ’n pan en soteer grasuie tot sag.
  • Voeg brandrissie, knoffel en garnale by; soteer tot die garnale verbruin is.
  • Voeg room, ertjies en geurmiddels by en laat dan vir 2 minute saggies prut.
  • Meng liggies met die pasta, suurlemoenskil en -sap en pietersielie.
  • Dien dadelik op.

 

JONG HOENDER 

Bestanddele

1 mediumgrootte hoender

Seesout na smaak

1 mediumgrootte suurlemoen se sap

30 g hoenderekstrak

250 ml kookwater

Peri Peri sous van eie keuse

Metode

  • Maak hoender goed skoon. Vryf dan die vel met sout in.
  • Plaas hoender in ’n oondpan, druk suurlemoensap oor die hoender uit en voeg hoenderekstrak gemeng met water onder in die pan by.
  • Wanneer die hoender gaar is, maak ’n sous om daaroor te giet. Dit is ’n kombinasie van die pansappe en Peri Peri sous na smaak.

 

AARTAPPELROSTI MET SALMFOREL

Bestanddele

500 g aartappels, geskil

Sout en peper na smaak

60 ml olyfolie

1 groot ui, fyngekap

4 knoffelhuisies, fyngekap

30 ml platblaarpietersielie, fyngekap

2 eiers

½ suurlemoen se sap en skil

2 knoffelhuisies, fyngedruk

1 rooi brandrissie, fyngekap

80 g jongspinasie

1 knippie sout

30 ml wit asyn

4 eiers

200 g salmforel, om op te dien

Sout en peper na smaak

60 ml olyfolie

Metode

Aartappelrosti’s

  • Rasper geskilde aartappels, plaas in ’n skoon doek en druk al die oortollige vloeistof uit.
  • Sit die aartappel in ’n groot bak.
  • Verhit ’n pan, voeg ’n skeut olyfolie by en braai uie en knoffel tot sag.
  • Voeg by aartappel saam met gekapte platblaarpietersielie en eiers.
  • Geur na smaak en meng dan al die bestanddele met jou hande, behalwe die salmforrel.
  • Verdeel in 4 porsies en druk plat tot ongeveer 1 cm dik.
  • Verhit ’n groot kleefvrye pan oor matige tot hoë hitte.
  • Voeg ’n skeut olie by en braai die rosti’s vir ongeveer 2-3 minute of tot goudbruin en bros, draai om en braai nog 2-3 minute.

Geposjeerde eiers

  • Kook ’n pot water.
  • Voeg asyn en ’n knippie sout by.
  • Verminder hitte en wag tot die water saggies prut.
  • Breek ’n eier in ’n koppie.
  • Gebruik ’n draadklitser en roer die pruttende water om ’n maalkolk te vorm; laat val die eier in die middel daarvan.
  • Herhaal met die ander 3 eiers.
  • Kook vir 3 minute, of totdat dit so gaar is soos jy daarvan hou.
  • Gebruik ’n gaatjieslepel en laat die eiers op papierhanddoek dreineer.
  • Rangskik rosti, geposjeerde eiers en salmforel op ’n bord en dien op.

 

GEROOSTERDE TONGVIS

Bestanddele

2 heel tongvisse, sonder vel (vra die visverkoper om die vel te verwyder)

Olie om mee te smeer

2 suurlemoene se sap

30 ml water

50 g botter

30 ml fyngekapte pietersielie

Metode

  • Verhit oondrooster tot by mediumhoog.
  • Olie en geur tongvis en plaas op ’n goedgesmeerde bakplaat.
  • Rooster vir 10-15 minute sonder om dit om te draai, totdat dit gaar is en begin vlokke maak.
  • Voeg intussen 30 ml water by die suurlemoensap.
  • Verhit ’n pan en voeg botter by.
  • Laat smelt tot die botter skuim en wanneer dit begin bruin word en neuterig ruik, voeg die suurlemoensap by; eers die helfte, proe die sous en voeg dan die res na smaak by.
  • Wanneer die sous hard borrel, haal die pan van die hitte af. Voeg pietersielie by en geur goed.
  • Giet sous oor geroosterde vis en dien op.

 

KAASKOEK

Bestanddele

1 x 250 g pakkie tennisbeskuitjies, fyngedruk

100 g botter, gesmelt

200 g volvet-roomkaas

300 g suurroom

175 g strooisuiker

3 groot eiers

Bar One-bolaag

2 groot Bar Ones, in stukkies gesny

125 ml room

Metode

  • Voorverhit oond tot by 160 °C .
  • Verkrummel tennisbeskuitjies in ’n voedselverwerker.
  • Voeg gesmelte botter by en verwerk tot goed gemeng.
  • Druk krummel-en-botter-mengsel op die bodem van ’n 22 cm-veerbakpan vas en plaas in yskas.
  • Meng roomkaas, suurroom en strooisuiker.
  • Klop eiers by die mengsel in.
  • Giet vulsel op beskuitjiekors.
  • Bak vir 1 uur.

Bar One-bolaag: Smelt sjokolade met room in ’n dubbelkoker. Wanneer glad, smeer versigtig bo-oor kaaskoek.

 

SUURLEMOEN-EN-SPRIETUIE-MAYONNAISE

Bestanddele

3 eiergele

1 knippie Engelse mosterdpoeier

1 knippie gemaalde wit of swart peper

30 ml appelasyn

250 ml grondboontjieolie

50 ml ekstra-suiwer olyfolie

1 suurlemoen se skil

1 bossie sprietuie, fyngekap

Metode

  • Meng eiergele met mosterdpoeier, peper, 15 ml appelasyn en ’n knippie sout in ’n bak.
  • Meng die olies in ’n beker. Gebruik ’n elektriese draadklitser om die eiergeelmengsel te klits en drup dan geleidelik, druppel-vir-druppel, die olie by.
  • Wanneer die mengsel bleker en dikker geword het en geen olie meer sigbaar is nie, kan die olie effens vinniger bygevoeg word terwyl jy die heeltyd klits.
  • Wanneer al die olie bygevoeg is en jy het ’n dik mayonnaise, proe en geur met meer asyn, sout en peper.
  • Roer suurlemoenskil en sprietuie by; verkoel tot dit opgedien word.

 

GEURIGE MAALVLEIS

Bestanddele

10 ml olyfolie

1 medium bruin ui, fyngekap

2 knoffelhuisies, fyngedruk

500 g beesmaalvleis

30 ml Cajun-geurmiddel

2 brandrissies

2 mediumgrootte tamaties, fyngekap

30 ml suurlemoensap

60 ml biefekstrak

30 ml fyngekapte platblaarpietersielie vir garnering

Metode

  • Verhit olie in ’n braaipan oor matige hitte. Voeg ui en knoffel by. Braai vir 3-4 minute of tot sag.
  • Verhoog hitte na mediumhoog. Voeg maalvleis by. Kook en roer met ’n houtlepel om maalvleis los te maak, vir 6-8 minute of tot verbruin.
  • Voeg geurmiddels by. Roer en kook vir 1 minuut of totdat dit geurig ruik.
  • Voeg tamaties, suurlemoensap, rissies en ekstrak by. Bring tot by kookpunt.
  • Verminder hitte na mediumlaag. Prut vir 10 minute of totdat dit verdik.
  • Plaas die maalvleis in ‘n wrap en verbruin vir 2 minute tot goudbruin.

 

SOET BRANDRISSIEHOENDER 

Bestanddele

2 hoenderborsies

5 ml sout

2,5 ml peper

1 eier, geklits

185 ml meel (100 g)

1 groen soetrissie, in skywe gesny

1 rooi soetrissie, in skywe gesny

Brandrissiesous

3 knoffelhuisies, fyngedruk

1 rooi brandrissie, gekap

45 ml sojasous

30 ml tamatiepuree

125 ml water

Metode

  • Geur hoender met sout en peper.
  • Sny hoender in dun repies en bedek met eier-en-meel-mengsel.
  • Braai in vlak olie vir ’n paar minute aan elke kant, tot goudbruin.
  • Voeg soetrissies by en braai nog ’n paar minute. Verwyder hoender en soetrissies en hou eenkant.
  • Sit knoffel, rooi brandrissie, sojasous, tamatiepuree en water in dieselfde pan. Roer en prut totdat die mengsel afkook en dik en stroperig is.
  • Voeg hoender en soetrissies by en roer om goed met die sous te meng.

 

GESKROEIDE BEESVLEISREPIES

Bestanddele

1 klein ciabattabroodjie, in dik snye gesny

375 g maer kruisskyf, lendeskyf of kitslendeskyf, in 10 cm-repies gesny

60 ml olyfolie

15 ml worcestersous

5 ml geursel vir vleisskywe

5 ml sagte ligbruin suiker of loperige heuning

1 klein rooi ui, geskil en in skywe gesny

75 g sampioene, in skyfies gesny

15 ml tamatieblatjang of -kruidery

100 g-pakkie jongspinasie of wilde roketblare, afgespoel

30 ml varsgekapte platblaarpietersielie vir garnering

Metode 

  • Bedruip ciabattasnye met helfte van olyfolie.
  • Verhit ’n roosterpan tot warm en verhit snye vir 2 minute aan elke kant. Plaas op ’n warm bord.
  • Meng die worcestersous, vleisskyfgeursel, suiker of heuning en geurmiddels in ’n groot bak. Voeg die beesvleisrepies by, meng liggies, bedek en hou eenkant.
  • Verhit 15 ml olie in ’n mediumgrootte pan en braai uie en sampioene vir 3-4 minute.
  • Roer tamatieblatjang of -kruidery by, asook spinasie of roketblare. Geur na smaak.
  • Verhit oorblywende olie in die roosterpan en maak beesvleis vir 2-3 minute aan elke kant gaar.
  • Om op te dien, verdeel sampioen-en-spinasie-mengsel eweredig oor ciabattasnye en plaas beesvleisrepies en varsgekapte pietersielie bo-op.

PÊRELKOESKOES

Bestanddele

30 ml olyfolie (plus nog meer om mee te bedruip)

200 g pêrelkoeskoes (groot)

1 rooi ui, fyngekap

1 suurlemoen se sap en skil

1 bossie vars pietersielie, fyngekap

1 bossie vars kruisement, fyngekap

1 bossie vars koljander, fyngekap

Sout

Varsgemaalde swart peper

1 knippie sumak (opsioneel)

Metode

  • Plaas 15 ml olie in ’n pan en voeg die koeskoes by. Braai vir ’n paar minute totdat die koeskoes ruik asof dit gerooster is, bedek dan heeltemal met soutwater.
  • Bring tot kookpunt en prut vir 6-8 minute, of tot die koeskoes net-net sag is.
  • Gebruik ’n kolander of sif om die koeskoes te dreineer en plaas in ’n bak.
  • Roer die rooi uie, suurlemoenskil en kruie by.
  • Klits die oorblywende 15 ml olie met suurlemoensap en geur met sout en peper.
  • Giet oor die koeskoes en sprinkel die (opsionele) sumak bo-oor. Meng goed en dien warm of koud op.
  • Voeg groente van jou keuse by, bv. spinasie, sampioene, ens.

 

 

 

 

Notice: Trying to access array offset on value of type bool in /usr/www/users/weddiny/wp-content/plugins/ds-suit/includes/modules/MasonryGallery/MasonryGallery.php on line 447