The Nut Farm Resepte

CINNABON-EN-PEKAN-GLADDEJANTJIE (Smoothie)

Bestanddele

½ bevrore ryp piesang

60 ml geroosterde pekanneute

125 ml melk

125 ml koue water

1,25 ml vanieljegeursel

1,25 ml fyn kaneel, met meer na smaak

60 ml hawermout

90 ml volroom- Griekse jogurt

Metode

  • Plaas al die bestanddele in ’n voedselversapper en verwerk tot glad.
  • Dien dadelik op.

MAKLIKE SPAANSE TORTILLA

Bestanddele

1 groot wit ui

¼ groen soetrissie

60 ml olyfolie

25 g botter

2 mediumgrootte tamaties

400 g aartappels, geskil, in kwarte en dan in dun skyfies gesny

2 knoffelhuisies

8 eiers, geklits

100 ml cheddarkaas, gerasper

Metode

  • Plaas ’n groot kleefvrye pan op lae hitte. Braai ui en groen soetrissie stadig in olie en botter tot sag maar nie bruin nie.
  • Skil intussen tamaties (indien gebruik): Sny ’n kruisie op die skil, sit tamaties in ’n bak en bedek met kookwater. Dreineer water na 2-3 minute en die skille sal maklik afkom. Kap grofweg en voeg by ui en soetrissie in die pan.
  • Voeg aartappels by, bedek en kook vir nog 15-20 minute; roer af en toe om seker te maak dit braai egalig.
  • Wanneer aartappels sag en ui glansend is, maak 2 knoffelhuisies fyn en roer by, gevolg deur geklitste eiers.
  • Sit die deksel terug op die pan en laat die tortilla stadig gaar word. Na 20 minute behoort die kante en onderkant goudkleurig te wees, die bokant gestol maar die middel nog effens drillerig. Draai die tortilla om deur dit van die pan af op ’n bord te laat gly, plaas ’n ander bord bo-op, draai die hele ding om en laat dit weer in die pan afgly om klaar te kook.
  • Wanneer dit gaar is, plaas op ’n bord en dien warm of koud op.

 

PEKAN-BISCOTTI

Bestanddele

5 ml olie om te smeer

270 g veeldoelige meel

5 ml bakpoeier

2,5 ml sout

150 g strooisuiker

100 g botter, saggemaak

2 groot eiers

10 ml amandelgeursel

5 ml vanieljegeursel

250 ml grofgekapte pekanneute

125 ml karamelstukkies

Metode

  • Voorverhit oond tot by 180 °C. Voer ’n bakplaat met bakpapier uit en borsel liggies met olie.
  • Kombineer die droë bestanddele: Klits veeldoelige meel, bakpoeier en fyn seesout saam.
  • Kombineer die nat bestanddele: Plaas ongesoute botter en wit suiker in ’n groot mengbak. Klits met ’n elektriese handmenger tot goed gemeng en romerig − ongeveer 1 minuut.
  • Voeg eiers een op ’n slag by en klop om dit in te meng.
  • Voeg amandel- en vanieljegeursel by en meng.
  • Meng droë en nat bestanddele en vou gekapte pekans en karamelstukkies in.
  • Vorm ’n wye rol met die deeg en plaas op die voorbereide bakplaat. Bak tot liggoud – ongeveer 30-35 minute.
  • Plaas die bakpan op ’n afkoelrak en laat vir 30-40 minute afkoel. Verlaag die oondtemperatuur na 160 °C.
  • Plaas die rol op ’n broodplank en gebruik ’n broodmes om ongeveer 16 snye te sny.
  • Rangskik die biscotti met die gesnyde kante ondertoe op die bakplaat en bak weer vir 22-25 minute tot ligte goudbruin. Haal die pan na 15 minute uit die oond en draai die stukke een keer om.

 

CHAITEEMUFFINS

Bestanddele

225 ml volroommelk

4 chaiteesakkies

5 ml fyn kaneel

400 g meel

10 ml bakpoeier

150 g bruin suiker

75 g grofgekapte pekanneute

2 groot eiers

150 ml sonneblomolie

Metode

  • Verwarm melk met inhoud van teesakkies en kaneel. Roer tot gemeng en hou eenkant om af te koel.
  • Terwyl melk afkoel, voorverhit oond tot by 180 °C en plaas papierbakkies in ’n muffinpan met 12 holtes.
  • Meet meel, bakpoeier, suiker en 45 g van die pekanneute in ’n groot mengbak af en meng goed.
  • Wanneer melk afgekoel het, voeg eiers en olie by en klits goed.
  • Voeg nat bestanddele by droë bestanddele en meng met ’n houtlepel.
  • Verdeel mengsel tussen die muffinbakkies, strooi oorblywende pekanneute bo-oor en bak vir 20-25 minute, of totdat ’n koekpen skoon uitkom en die muffins effens gerys het en goudbruin is.
  • Haal uit en laat vir ongeveer 10 minute op ’n draadrak afkoel.

 

ROMERIGE SAMPIOENSOP

Bestanddele

90 g botter

2 mediumgrootte uie

1 knoffelhuisie, fyngedruk

500 g sampioene, fyngekap (wees kreatief en gebruik ’n verskeidenheid sampioene)

30 ml meel

1 l warm hoenderekstrak

1 lourierblaar

250 ml vars room

5 ml truffelolie (opsioneel)

Metode

  • Verhit botter in ’n groot pan en braai uie en knoffel tot sag maar nie bruin nie, ongeveer 8-10 minute.
  • Voeg sampioene by en kook op hoë hitte vir nog 3 minute tot sag.
  • Sprinkel meel bo-oor en roer om te meng. Voeg hoenderekstrak by, verhit die mengsel tot by kookpunt, voeg dan die lourierblaar by en prut vir nog 10 minute.
  • Verwyder lourierblaar, haal sampioenmengsel van die stoof af en gebruik ’n elektriese handklitser om die mengsel glad te kry.
  • Verhit sop weer versigtig en roer room deur.
  • Voeg ’n paar druppels truffelolie by en dien op.

 

CAPRI CROQUE MONSIEUR

Bestanddele

Witsous

60 ml botter

60 ml meel

375 ml volroommelk

5 ml dijon-mosterd

Knippie gemaalde neutmuskaat

Knippie sout en peper

Toebroodjies

8 snye brood (kan enige soort brood wees waarvan jy hou – ons hou van suurdeegbrood)

8 snye ham van ’n goeie gehalte

625 ml emmentalerkaas, gerasper

60 ml parmesaankaas, vars gerasper

Handvol vars basiliekruidblare

2 vars, ryp, groot tamaties, in skywe gesny

Metode

Witsous

  • Smelt botter in ’n mediumgrootte pan op matige hitte.
  • Klits meel by en kook vir ongeveer 3 minute; roer gedurig.
  • Voeg melk by en roer deeglik totdat mengsel glad is.
  • Kook en roer totdat sous verdik.
  • Geur met ’n bietjie sout en peper. Haal van die stoof af en klits mosterd en neutmuskaat by.

Toebroodjies

  • Voorverhit oond tot by 200 °C. Voer ’n bakplaat met bakpapier.
  • Smeer elke sny brood met ’n laag witsous, tot reg aan die kante.
  • Plaas 4 snye brood op voorbereide bakplaat met die witsouskant bo. Sit ’n sny ham, 2-4 skywe tamatie, ’n paar basiliekruidblare en ’n handvol emmentaler bo-op en strooi parmesaankaas bo-oor.
  • Maak toe met die ander 4 snye brood, witsouskant bo, en strooi die res van die emmentaler en parmesaan bo-oor.
  • Bak by 200 °C vir ongeveer 5-6 minute, totdat kaas gesmelt het; skakel dan die oondrooster aan en rooster totdat die kaas bo-op goudkleurig is, 2-4 minute.

 

MAKLIKE POUTINE (RYK KANADESE AARTAPPELSKYFIES)

Bestanddele

Poutine-sous

60 ml botter

60 ml meel

400 ml biefekstrak

150 ml hoenderekstrak

Sout en peper na smaak

Aartappelskyfies

600 g bevrore aartappelskyfies

Olie om in te bak

Bolaag

125 ml geskeurde stukke cheddar (nie gerasper nie)

Metode

  • Smelt botter in ’n groot pan. Voeg meel by, roer gereeld en kook vir ongeveer 5 minute totdat die mengsel bruin word.
  • Voeg bief- en hoenderekstrak by, klits met ’n draadklitser en bring tot by kookpunt. Geur met peper. Proe en voeg nog sout by indien nodig. Maak vooraf en verhit weer of hou dit warm totdat die skyfies reg is.
  • Verhit olie in ’n diepbraaier of groot, wye pot.
  • Sit skyfies in olie en bak totdat aartappels goudbruin is. Plaas op papierhanddoek om te dreineer.
  • Plaas gaar skyfies in ’n groot bak. Skep ’n groot lepel warm poutine-sous in die bak en gebruik ’n kostang om skyfies liggies met sous te meng. Voeg nog sous by soos nodig om al die skyfies te bedek.
  • Voeg kaas by en meng met warm skyfies en sous.
  • Dien dadelik op met varsgemaalde peper.

 

GEROOSTERDE BOTTERSKORSIE-EN-BOKMELKKAAS-SLAAI

Bestanddele

1 botterskorsie, geskil, ontpit en in blokkies gesny

1 knoffelhuisie

1 roosmaryntakkie

Swart peper na smaak

30 ml olyfolie

100 g roket

100 g bokmelkkaas, in skywe gesny

30 ml pekanneute, gekap

Slaaisous

60 ml olyfolie

30 ml balsamiese asyn

15 ml heuning

15 ml sojasous

15 ml lemoensap

Knippie sout en peper

Metode

  • Verhit oond tot by 200 °C.
  • Sit botterskorsieblokkies in ’n bakpan saam met knoffel, roosmaryn en swart peper.
  • Bedruip met olie, meng goed en rooster in die oond vir ongeveer 25 minute tot sag.
  • Klits slaaisousbestanddele saam.
  • Plaas roket in ’n groot slaaibak en rangskik botterskorsie en bokmelkkaas bo-op.

 

BLATJANGHOENDER

Bestanddele

15 ml olyfolie

1 ui, gekap

1 knoffelhuisie, fyngedruk

90 ml mangoblatjang

15 ml worcestersous

90 ml mayonnaise

8 hoenderdytjies, nog met vel en been

Metode

  • Verhit oond tot by 180 °C.
  • Verhit olie in ’n braaipan oor matige hitte en braai uie en knoffel vir ’n paar minute tot sag.
  • Roer blatjang, worcestersous en mayonnaise by. Proe en geur.
  • Rangskik hoenderdytjies op ’n bakpan met foelie uitgevoer en skep blatjangmengsel bo-oor.
  • Rooster hoender in die oond vir 40-45 minute, tot deurgaar en lekker taai.

 

CACIO E PEPE

Bestanddele

300 g dik spaghetti of linguine

250 ml parmesaankaas

60 ml botter, in blokkies gesny

5 ml varsgekraakte growwe swart peper

Metode

  • Kook pasta volgens aanwysings op die pakkie in ’n groot pot goed gesoute water totdat dit net-net al dente is.
  • Terwyl die pastawater begin kook, rasper die kaas fyn.
  • Behou ’n deel van die styselrige pastawater: As die pasta so 1 minuut weg van al dente is, skep 500 ml van die kokende pastawater versigtig uit in ’n afsonderlike hittebestande houer. Hou eenkant.
  • Dreineer pasta in ’n kolander en plaas terug in die warm pot wat van hitte afgehaal is.
  • Voeg botterblokkies en 500 ml styselrige pastawater by en meng liggies. Voeg kaas en swart peper by en meng weer liggies.
  • Gaan voort om ekstra styselrige pastawater soos nodig by te voeg, totdat kaas heeltemal gesmelt het en ’n gladde sous vorm wat pasta eweredig bedek.

 

SKAAPSTERTJIES MET FYNGEMAAKTE WORTELS EN KEKERERTJIES

Bestanddele

Marinade

1 kg skaapstertjies

60 ml suurlemoensap

Handvol koljander

3 naeltjies

2 lourierblare

Sous

60 ml tamatiesous

60 ml worcestersous

60 ml soetrissiesous

60 ml sojasous

30 bruin suiker

5 ml paprika

Metode

  • Kook gemarineerde skaapstertjies vir 25 minute in ’n stoomdrukpot.
  • Haal uit die pot en braai oor matige kole, verf gereeld met die sous.
  • Garneer met koljander.

Fyngemaakte wortels en kekerertjies

15 ml botter, gesmelt

10 ml kaneel

4 wortels, in stukke gesny

1 knoffelhuisie

500 ml geblikte kekerertjies, gedreineer

200 ml room

Sout na smaak

60 ml tamatiesous

60 ml worcestersous

60 ml soetrissiesous

60 ml sojasous

30 ml bruin suiker

5 ml paprika

Metode

  • Voorverhit oond tot by 180 °C en voer ’n groot bakpan met bakpapier uit.
  • Meng gesmelte botter en kaneel. Giet oor gekapte wortels en knoffel en maak seker dat al die wortelstukke bedek is. Versprei oor die bakpan.
  • Gebruik dieselfde bak, bedek 125 ml kekerertjies met die oorskietmengsel en plaas op die bakpan by die wortels. Hierdie kekerertjies sal bros bak en word later as ’n bros bolaag gebruik.
  • Strooi sout oor en bak vir 30-35 minute, totdat wortels sag en verglans is.
  • Haal uit oond en hou bros kekerertjies eenkant.
  • Plaas wortels, die ander 375 ml kekerertjies en room in ’n bak.
  • Druk knoffelhuisie uit die skil in die bak en puree die mengsel met ’n stokmenger.
  • Sprinkel bros kekerertjies bo-oor en dien op.

 

PIZZA MET ROOIBOS-GEPOSJEERDE PEER, PROSCIUTTO EN BLOUKAAS

Bestanddele

1 klaar gemaakte pizzabasis

30 ml dijon-mosterd

100 g prosciutto

50 g gekrummelde bloukaas

200 g mozzarellaskaafsels

Geposjeerde peer

250 ml witwyn

2 rooibosteesakkies

100 g suiker

1 steranys

1 kaneelstokkie

3 naeltjies

1 peer, geskil

Metode

  • Posjeer peer: Plaas wyn, teesakkies, suiker, speserye en peer in ’n pan en prut vir 20 minute oor matige hitte.
  • Verwyder peer uit die pan en verhoog hitte om vloeistof tot ’n dun stroop af te kook. Wanneer dit afgekook het, sny peer in dun skywe en plaas terug in stroop.

Pizza

  • Smeer dijon-mosterd egalig oor die basis.
  • Pak prosciutto en peerskywe bo-op.
  • Voeg mozzarella en bloukaas by en bak in die oond vir 15 minute by 200 °C totdat kaas goudbruin is.
  • Bedruip met oorskietposjeerstroop en dien dadelik op.

 

APPELTERTGELATO

Bestanddele

250 g Granny Smith-appels

142 g strooisuiker

60 g melkpoeier

5 ml kaneel

228 g vars room

2,5 ml xanthan-gom

355 g water

Metode

  • Skil, ontpit en sny appels in stukkies en plaas in ’n pan.
  • Voeg strooisuiker by en kook tot sag.
  • Giet mengsel in ’n versapper en meng tot glad.
  • Meng al die droë bestanddele in ’n afsonderlike bak.
  • Voeg nat bestanddele by droë bestanddele, maar nie die appelmengsel nie.
  • Plaas die mengsel met nat en droë bestanddele terug in die pan. Verhit tot dit by 85 °C gepasteuriseer word en laat oornag afkoel.
  • Vermeng appels met die mengsel voordat jy dit karring.
  • Karring in ’n roomysmaker.
  • Bevries onmiddellik.

 

GEBAKTE SOUTKARAMELKAASKOEK

Bestanddele

Kors

250 g tennisbeskuitjies

150 g gesmelte botter

Karamelsous

500 ml strooisuiker

185 ml water

250 ml room

5 ml sout

Vulsel

500 g roomkaas

125 ml strooisuiker

4 eiers

250 g suurroom

Metode

  • Keer bodem van ’n ronde 24 cm-veerbakpan om sodat die randjie ondertoe wys (dit sal nog steeds in die kant van die pan inpas). Smeer en voer met bakpapier uit.
  • Maal beskuitjies in ’n voedselverwerker tot fyn. Voeg gesmelte botter by en verwerk tot goed gemeng. Druk mengsel oor basis en teen kante van die voorbereide pan vas. Plaas pan op ’n bakplaat en verkoel vir 30 minute in yskas.
  • Om sous te maak, los suiker in water op in ’n mediumgrootte pot oor lae hitte. Bring tot by kookpunt en kook saggies, sonder om te roer, vir ongeveer 15 minute, of totdat die sous goudbruin is. Haal van hitte af.
  • Roer dadelik room by tot glad. Roer sout by. Giet in ’n hittebestande beker en laat effens afkoel.
  • Om vulsel te maak, klop roomkaas en strooisuiker in die groot bak van ’n elektriese menger tot glad.
  • Klop eiers een vir een by.
  • Klop suurroom by.
  • Giet helfte van vulsel oor kors. Bedruip met helfte van karamelsous en bedek met res van vulsel. Gebruik ’n sosatiestokkie om die twee mengsels saggies te vermeng sodat dit warrels vorm.
  • Bak vir 1 uur en 10 minute in ’n matige koel oond (160 °C), of tot pas gestol; die middel moet nog effens dril. Laat vir 1 uur in oond afkoel met die deur oop. Haal uit oond, bedek en plaas oornag in die yskas.
  • Om op te dien, verwyder kant van die pan en verskuif die bodem met die kaaskoek na ’n opdienbord. Dien op met geklitste dubbelroom en oorblywende karamelsous.

 

 

Notice: Trying to access array offset on value of type bool in /usr/www/users/weddiny/wp-content/plugins/ds-suit/includes/modules/MasonryGallery/MasonryGallery.php on line 447