Klein Kaap Boutique Hotel Resepte

Ouvrou-onder-die-kombers

Bestanddele

  • 4 bees-/varkworsies
  • 20 ml ekstra-suiwer olyfolie
  • 285 ml volroommelk
  • 115 g meel
  • 3 groot eiers
  • 410 g chakalaka

Metode

  • Voorverhit ’n broodpan of vuurvaste skottel in die oond tot by 200 °C.
  • Plaas die olyfolie en worsies in die skottel na dit verhit is.
  • Meng die melk, meel en eiers om ’n beslag te maak en voeg dit by die worsies.
  • Bak vir 15 minute en dien op met gekoopte chakalaka.

 

Gebakte hawermout

Bestanddele

  • 10 ml botter teen kamertemperatuur
  • 500 ml hawermout
  • 5 ml fyn kaneel
  • 5 ml bakpoeier
  • 2,5 ml sout
  • 500 ml melk/amandelmelk
  • 60 ml bruin suiker
  • 1 eier
  • 5 ml vanieljegeursel
  • 2 ryp piesangs
  • 375 ml geurmiddels – sjokoladebrokkies/neute/bloubessies

Metode

  • Voorverhit die oond tot by 180 °C.
  • Smeer ’n mediumgroot oondskottel met die botter.
  • Meng al die bestanddele en giet in die gesmeerde skottel.
  • Bak vir 40 minute tot goudbruin.

Sonopverrassing: brekfisbroodjie vir twee

Bestanddele

  • 5 eiers
  • 45 ml melk
  • 45 ml botter
  • Sout en peper na smaak
  • 4 wit of bruin snye brood (of ciabatta), gerooster
  • 60 ml tamatiesous of tamatieblatjang
  • 250 ml gerasperde cheddarkaas

Metode

  • Smelt die botter in ’n pan en roer die eiers met die melk, geur met sout en peper na smaak.
  • Rooster die snye brood en smeer botter aan die een kant.
  • Rangskik die snye brood op ’n oondpan en skakel die oondrooster aan.
  • Rangskik die roereier bo-op die roosterbrood.
  • Smeer tamatiesous of -blatjang oor die eier.
  • Bedek met gerasperde kaas.
  • Rooster vir ’n rukkie in die oond, tot goudbruin.

 

Eierbakkies

Bestanddele

  • 4 eiers
  • 125 ml volroommelk
  • 125 ml roomkaas
  • 30 ml gekapte pietersielie
  • Sout en varsgemaalde swart peper na smaak
  • 250 ml oorskietgroente (murgpampoentjies, brokkoli, geroomde spinasie, botterskorsie) en/of kouevleis, grof gekap
  • 6 kersietamaties
  • 6 blokkies fetakaas

Metode

  • Klits die eiers, melk en roomkaas met ’n draadklitser. Geur met sout, peper en gekapte pietersielie.
  • Smeer ’n muffinpan met 6 holtes.
  • Verdeel die groente en vleis tussen die 6 holtes en maak driekwartpad vol.
  • Giet die eiermengsel oor die groente.
  • Plaas ’n kersietamatie en ’n fetablokkie in elke holte en druk dit effens in die mengsel in.
  • Bak in ’n warm oond teen 180 °C vir 20−30 minute, tot gestol.
  • Laat effens afkoel voordat jy die eierbakkies uit die pan uithaal.
  • Anders kan jy met al die bestanddele ’n mini-quiche in ’n tertpan maak.

Groen Thaise viskerrie

Bestanddele

  • 15 ml ekstra-suiwer olyfolie
  • 30 ml Thaise groenkerriepasta
  • ½ fyngekapte ui
  • 200 g suiker-ertjies
  • 30 ml fyngekapte vars gemmer
  • 400 g klappermelk
  • 400 g witvisfilet sonder die vel, soos stokvis of forel, in groterige stukke gesny
  • 1 halm sitroengras, liggies gekneus (opsioneel)
  • 150 g jong spinasie
  • 15 ml Asiatiese vissous
  • 1 rooi brandrissie, fyngesny
  • Gekapte vars koljander vir opdiening
  • 2 mediumgroot lemmetjies in skyfies gesny
  • Gestoomde basmatirys vir opdiening

Metode

  • Verhit die olyfolie in ’n mediumgroot pan.
  • Voeg die kerriepasta, uie, suiker-ertjies en gemmer by en braai totdat die ui verbruin, so 5 minute lank.
  • Voeg die klappermelk by, verminder die hitte en laat prut.
  • Voeg die vis en sitroengras by en prut vir 3 minute of totdat die vis deurgaar is, geur dan met die vissous.
  • Voeg die jong spinasie en rooi brandrissie by en kook vir nog 5 minute.
  • Dien op met vars gekapte koljander, lemmetjieskyfies en basmatirys.

Gevulde swart sampioene

Bestanddele

  • 6 groot portabellasampioene
  • 15 ml ekstra-suiwer olyfolie
  • 1 medium ui, fyngekap
  • 1 huisie knoffel, fyngedruk
  • 250 g Italiaanse worsies met die vel verwyder (opsioneel)
  • 5 g gerookte paprika
  • 125 ml broodkrummels
  • 125 ml gerasperde parmesaankaas
  • Gekapte vars pietersielie
  • 100 ml droë witwyn
  • 125 ml gerasperde cheddarkaas
  • 60−120 ml gesmelte botter
  • Vars roketblare vir opdiening

Metode

  • Verwyder die sampioene se stingels en kap dit fyn.
  • Soteer die ui, knoffel en gekapte sampioenstingels in olyfolie totdat die ui sag is.
  • Voeg die Italiaanse worsies en paprika by en braai vir nog 5 minute.
  • Meng die broodkrummels, parmesaankaas en pietersielie.
  • Giet die wyn en gesmelte botter in die pan en voeg dan die droë bestanddele by.
  • Geur met sout en peper na smaak.
  • Plaas die sampioene op ’n gesmeerde bakpan en vul elkeen met ’n groot lepel van die vulsel. Strooi cheddarkaas oor elke sampioen.
  • Bak by 180 °C vir 20 minute, totdat die vulsel goudbruin word. Garneer met vars roketblare en dien dadelik op.

Klassieke crème brûlée vir twee

Bestanddele

  • 250 ml dik room
  • ⅓ vanieljepeul
  • 3 groot eiergele
  • 60 ml suiker
  • 1,25 ml sout
  • 2,5 ml espressopoeier (opsioneel)
  • Suiker om oor te strooi
  • Vars aarbeie om mee op te dien

Metode

  • Voorverhit die oond tot by 160 °C.
  • Laat die room in ’n kastrolletjie op hoë hitte begin prut.
  • Sny die vanieljepeul in die lengte deur en skraap die saadjies in die room in, voeg dan die vanieljepeul, sout en espressopoeier by. Verwyder van die hitte en hou dit eenkant vir 30 minute.
  • Kook water in ’n pot.
  • Meng die eiergele en suiker in ’n mengbak en klop totdat die mengsel liggeel en dik is. Plaas ’n fyn gaassif oor die bak en syg die roommengsel deur in die eiermengsel in. Klop met ’n draadklitser totdat dit glad is.
  • Plaas ’n papierhanddoek op die bodem van ’n oondpan wat groot genoeg is om die twee vuurvaste oondbakkies te bevat. Plaas die ramekins op die papierhanddoek (dit voorkom dat die bakkies rondgly) en vul albei met ewe veel vlamengsel.
  • Vul die oondpan met genoeg kookwater om halfpad teen die kant van die oondbakkies by te kom. Wees versigtig om nie van die water in die vlamengsel te laat spat nie.
  • Bak vir so 25 minute of tot gestol, maar nog effens loperig in die middel.
  • Haal uit die oond uit en laat vir 15 minute in die oondpan afkoel, haal dan die bakkies uit en laat dit verder op ’n draadrak tot by kamertemperatuur afkoel.
  • Plaas vir 2 uur in die yskas om heeltemal af te koel.
  • Wanneer die vla afgekoel het, strooi suiker egalig oor die bokant. Gebruik ’n blaasvlammetjie of ’n spesiale kombuisblaasvlam en verbruin die bokant van die vla versigtig om die suiker te karamelliseer sodat dit ’n harde suikerlagie vorm. Verkoel en rangskik vars aarbeie bo-op om op te dien. Jy kan ook die suiker onder die oondrooster laat karamelliseer.

Hoender armadillo met groenslaai

Bestanddele

  • 4 hoenderfilette
  • 15 ml hoenderspeserye
  • 15 ml vars of gedroogde tiemie
  • 15 ml paprika
  • Sout en peper na smaak
  • Sap van 1 suurlemoen
  • 100 g groen aspersies (vars of ingelê) of gebruik strokies murgpampoentjie
  • 120 g mozzarellakaas, in 12 strokies gesny.
  • 8 stroke streepspek
  • Tandestokkies
  • Olyfolie om in gaar te maak
  • 125 ml witwyn

Metode

  • Sny die hoenderfilette aan die een kant oop om ’n sakkie te maak en maak dit effens plat.
  • Geur die binnekant van die filette met die helfte van die hoenderspeserye, tiemie, paprika en sout en peper. Druk ½ suurlemoen se sap oor die hoender uit.
  • Verdeel die aspersies of murgpampoentjiestrokies en mozzarellakaas tussen die hoenderstukke en stop die filette daarmee.
  • Druk nou die filette saggies toe en druk die res van die suurlemoensap bo-oor uit.
  • Draai elke filet in 2 stroke spek toe. Gebruik die tandestokkies om die spek mee in plek te hou.
  • Bedruip die bodem van ’n oondskottel met die olyfolie en plaas die hoenderstukke in die skottel.
  • Giet die witwyn oor die hoender.
  • Bedek en bak vir 30−45 minute in die oond by 180 °C totdat dit deurgaar is.
  • Dien op met jou gunsteling-groenslaai of -groentedis.

Beesvleis-trinchado met ciabatta-brood 

Bestanddele

  • 300 g kruisstuk, lendestuk of bolendeskyf (porterhouse), in dik repies gesny
  • 30 ml botter
  • 30 ml sonneblomolie
  • ½ wit ui, fyngekap
  • 15 ml koekmeel
  • 5 ml gekapte knoffel
  • 2,5 ml gekapte brandrissies of brandrissiepoeier
  • 5 ml vleisaftrekselpoeier
  • 100 ml warm water
  • 100 ml room
  • 50 ml rooiwyn
  • 1 lourierblaar
  • 6 swart olywe

Metode

  • Skroei die beesvleis in olie en botter in ’n warm pan om te verseël. Dit is belangrik vir die smaak.
  • Haal die vleis uit die pan uit en braai die uie in die oorblywende vet.
  • Voeg die meel, knoffel en brandrissie by en braai vir 2 minute op lae hitte.
  • Los die vleisaftrekselpoeier in die warm water op, voeg dit in die pan by en roer om te keer dat daar klonte ontstaan.
  • Voeg die room, rooiwyn en lourierblaar in die pan by.
  • Plaas die geskroeide strokies beesvleis terug in die pan met die sous en prut vir 5 minute.
  • Geur met varsgemaalde sout en peper na smaak.
  • Dien die vleis en sous in individuele diep bakkies op en plaas 3 olywe in die middel van die dis.
  • Geniet met varsgebakte ciabatta-brood.

Biefstuk Wellington met sampioene en spinasie, opgedien met vegetariese lasagne

Bestanddele

  • 400−500 g beesfilet
  • 50 ml sonneblomolie
  • 50 g botter
  • 1 wit ui, fyngekap
  • 5 ml gekapte knoffel
  • ½ pakkie knopiesampioene, skoongemaak en fyngekap
  • 200 g spinasie, gekap
  • Sout en peper na smaak
  • 10 ml suurlemoensap
  • Skilferkorsdeeg

Metode

  • Skroei die filet in ’n warm pan met die sonneblomolie en botter om die vleis aan alle kante te seël. Geur met sout en peper en hou eenkant.
  • Braai die ui, knoffel en sampioene in dieselfde pan. Voeg die spinasie by en meng totdat die spinasie verwelk het en die pansappe heeltemal weggekook het. Hou eenkant om heeltemal af te koel.
  • Rol die deeg op kleefplastiek oop en smeer die spinasie-en-sampioen-mengsel in ’n dun lagie op die koue deeg. Maak seker dat daar ’n ongesmeerde strook van ten minste 5 cm reg rondom die deeg is, sodat jy die filet heeltemal daarin kan toevou.
  • Plaas die geskroeide filet op die een punt van die deeg en rol dit versigtig met behulp van die kleefplastiek in die deeg toe, sodat dit ’n toe wors vorm. Druk die kante van die deeg onder die filet in om seker te maak dit is heeltemal verseël.
  • Tel die filet saggies op ’n gesmeerde oondpan en bak in ’n warm oond by 200 °C vir 25−30 minute vir halfgaar vleis. Jy kan ook ’n vleistermometer gebruik om die hitte na jou smaak te bepaal.
  • Laat die vleis vir 15 minute staan voordat jy dit sny.
  • Dien op met mosterdgegeurde kapokaartappels en oondgeroosterde groente.

Geroosterde vegetariese lasagne

Bestanddele

  • 1 klein botterskorsie, geskil en in 3 cm-blokkies gesny.
  • 250 g jong murgpampoentjies, in dik skyfies gesny.
  • 2 uie, in kwarte gesny
  • 50 ml olyfolie
  • Vars tiemie of roosmaryntakkies
  • 750 ml jong spinasie
  • 1 blikkie tamatie-en-uie-mengsel
  • 9 velle lasagne
  • 125 ml meel
  • 50 g botter
  • 1 liter warm melk
  • Sout en peper na smaak
  • 500 ml gerasperde cheddarkaas

Metode

  • Kap die groente grofweg, besprinkel met olie, voeg die vars kruie by en rooster in ’n warm oond tot net gaar.
  • Maak intussen die witsous:
  • Smelt die botter in ’n klein potjie.
  • Voeg die meel by en kook vir 2−3 minute.
  • Voeg die warm melk by en roer vinnig met ’n draadklitser om klonte te voorkom. Geur met sout en peper.
  • Hou aan om te kook tot die sous begin borrel. Haal van die stoof af.
  • Haal die groente uit die oond uit.
  • Smeer ’n oondvaste bakskottel.
  • Begin met ’n laag witsous, gevolg deur lasagnestroke, dan die geroosterde groente, helfte van die tamatie-en-uie-mengsel en helfte van die jong spinasie.
  • Giet ⅓ van die witsous oor die spinasie en herhaal die lae.
  • Eindig met witsous en strooi die gerasperde kaas daaroor.
  • Bak vir 1 uur in ’n warm oond by 180 °C, totdat dit bo-op plek-plek bruin is.
  • Laat dit vir 15−20 minute afkoel voordat jy dit sny en opdien.

Patat-gnocchi met salie-en-tamatie-sous

Bestanddele

Gnocchi

  • 2 mediumgroot patats
  • 500 ml meel + nog 125 ml
  • 10 ml sout

Sous

  • 45−60 ml botter
  • Handvol vars salieblare
  • Handvol gemarineerde songedroogde tamaties

Metode

Om die gnocchi te maak

  • Voorverhit die oond tot by 200 °C. Prik die patats met ’n vurk en bak dit dan vir 40−50 minute of tot sag. Hou eenkant om af te koel sodat jy dit maklik kan hanteer.
  • Meng die sout met 500 ml meel. Bestrooi ’n werkoppervlak met meel en gooi die meelmengsel hierop uit. Maak ’n holte in die middel van die meel.
  • Wanneer die patats koel genoeg is om te hanteer, trek die skille af en plaas een vir een in ’n fynmaker, of druk dit baie fyn met ’n aartappeldrukker. Daar moet geen klonte wees nie.
  • Druk jou hande in die meel en begin dan die patats in die meel inwerk. Hou aan totdat die meel en die patats ten volle vermeng is. Die deeg moenie vasklou nie, hou dus aan om meel by te voeg totdat jy ’n mooi droë deeg het.
  • Rol nou die deeg in ’n bal en sny dit in 8 gelyke dele. Rol elke deel in ’n lang wors omtrent so dik soos jou duim. Sny die gnocchi in stukkies van 2,5 cm lank. Dompel elke stukkie liggies in meel om seker te maak dis droog en sal glad nie vasklou nie. Hou aan totdat jy al die deeg opgebruik het.

Om die gnocchi te kook

  • Kook ’n pot met soutwater. Voeg die gnocchi by en laat dit vir ’n paar minute kook. Wanneer die gnocchi boontoe dryf, kook vir nog 30 sekondes en skep dan die gnocchi met ’n gaatjieslepel uit.
  • Meng met die salie-en-tamatie-sous.

Sous

  • Smelt die botter in ’n pan, voeg die salieblare by en meng. Die botter sal effens verbruin en neutagtig begin ruik. Verminder die hitte en voeg die songedroogde tamaties by om net deurwarm te raak. Pasop dat die botter nie brand nie.
  • Meng die gnocchi liggies met die sous en geniet.

Salm-en-roomkaas-tert

Bestanddele

Kors

  • 275 g (500 ml) bruismeel
  • 150 ml kookwater
  • 125 ml sonneblomolie
  • Knippie sout

Vulsel

  • 2 blikkies salm, gedreineer en gevlok
  • 1 houertjie (250 g) roomkaas
  • 30 ml gekapte grasuie
  • 3 eiers, geklits
  • 125 ml volroommelk of room
  • Varsgemaalde swart peper

Metode

  • Voorverhit die oond tot by 180 °C.
  • Plaas al die bestanddele vir die kors in ’n houer met ’n styfpassende deksel wat goed seël. Skud die houer op en af totdat ’n sagte deeg vorm.
  • Druk die kors op die bodem en teen die kante van ’n gesmeerde tertpan met ’n los boom, 23 cm in deursnee.
  • Voer die kors met ‘n stuk foelie of bakpapier uit en vul dit met droë boontjies of rys. (Dit sal voorkom dat die kors krimp en oppof terwyl dit bak.)
  • Bak totdat die kante goudbruin is, gewoonlik vir so 25 minute. Verwyder die foelie en boontjies. Laat op ’n draadrak afkoel.
  • Rangskik die salm, roomkaas en grasuie onder op die tertkors. Strooi peper oor. Klits die eiers met die melk of room in ’n klein bakkie. Giet versigtig oor die salmmengsel.
  • Bak totdat die vulsel oppof en goudbruin is, gewoonlik vir so 30 minute. Laat op ’n draadrak afkoel. Verwyder die kante van die tertpan.
  • Dien warm op met vars roketblare en jou gunstelingslaai.

Steurgarnaalpasta met knoffel, olyfolie, brandrissie, gekapte pietersielie en parmesaan

Bestanddele

  • 340 g pasta van jou keuse – gekook
  • 75 ml olyfolie
  • 5 knoffelhuisies, in dun skyfies gesny
  • 5 ml gedroogde rooi brandrissievlokkies
  • 5 ml fyngerasperde suurlemoenskil
  • Groot knippie sout
  • 10−20 steurgarnale, uitgedop en met die aar verwyder
  • 60 ml witwyn
  • 15 ml suurlemoensap
  • 1 groot bossie platblaarpietersielie, gekap

Metode

  • Verhit 30 ml olyfolie in ’n groot braaipan op medium hitte.
  • Voeg die knoffel, brandrissievlokkies, suurlemoenskil en sout by, kook en roer vir 30 sekondes.
  • Voeg die steurgarnale by en kook vir 2 minute of tot goudbruin.
  • Voeg die wyn by en laat prut totdat die helfte van die vloeistof weggekook het. Haal die pan van die stoof af.
  • Voeg die garnaalmengsel by die warm pasta, asook die oorblywende olyfolie, suurlemoensap en vars pietersielie.
  • Dien dadelik op met varsgemaalde swart peper.
Notice: Trying to access array offset on value of type bool in /usr/www/users/weddiny/wp-content/plugins/ds-suit/includes/modules/MasonryGallery/MasonryGallery.php on line 447